„Алкалоид“ доби интегрирана еколошка дозвола од Министерството за животна средина и просторно планирање, со што се вброи во листата со одговорни компании, кои во секојдневните производствени операции се грижат и водат сметка за интегрирано спречување и за контрола на загадувањето на животната средина.

Поради усогласување со законската регулатива во земјава и со законодавството на ЕУ, како и поради интегрирано спречување и контрола на загадувањето, „Алкалоид“ АД Скопје подготовките за добивање ваква дозвола ги започна во 2007 година, потфат за кој се вложени над половина милион евра.

Од компанијата соопштија дека грижата за животната околина е еден од долгорочните принципи на деловната политика на „Алкалоид“ АД Скопје, а согласно со начелата на добрата производствена практика системот за управување со животната средина е дел од интегрираниот систем за управување со квалитетот.