Poslovne vesti - Makedonija

оне.Вип со нова мрежа во кумановскиот регион

Компанијата оне.Вип во средата објави дека успешно го имплементира првиот прокет за изградба на нова мрежа во регионот Куманово, Крива Паланка и Кратово, најавувајќи нова мрежа и во другите региони.

Целта на новата мобилна мрежа е да обезбеди за сите корисници на оне.Вип, значително поголем капацитет за  користење на 3G технологијата, покриеност на целата територија на земјата и достапност на 4G LTE низ цела Македонија и сето тоа за да обезбеди најдобро корисничко искуство и да ги обезбеди најновите светски технолошки достигнувања во мобилниот сегмент, велат од компанијата.

Со спојувањето во новиот ентитет, оне.Вип, создадовме компанија со поголем инвестициски капацитет и се обврзавме да ги воведеме најновите технологии во земјата, уште поквалитетни и нови иновативни услуги базирани на најмодерни мрежи и технологии. Денеска со гордост ги објавуваме првите резултати постигнати со инвестицијата што ја почнавме за изградба на нова мобилна мрежа, што е значајно подобрување во регионот на Куманово, Крива Паланка и Кратово, изјави Никола Љушев, Извршен директор на оне.Вип.   

Ова е прв регион каде имплементацијата на новата мрежа е успешно спроведена. Во моментот тимовите работат на изградба на нова мрежа во Скопскиот регион и на крајот на годината ќе заврши во сите урбани делови во Македонија.

Корисниците ќе почувствуваат значително подобрување со покриеност на мрежата – 3G и 4G ќе бидат достапни насекаде, а значителни подобрувања ќе се почувствуваат и во квалитетот на сервисите: подобра брзина, уште помалку падови во разговорите, и уште побрзо воспоставување на повиците, велат од компанијата.

Истовремено од компанијата најавуваат дека оне.Вип и Близу ќе бидат фокусирани на целосна модернизација и проширување на фиксната мрежна инфраструктура.

Новата кабловска HFC технологија на Вип/ Близу ќе понуди 2,5 пати поголеми брзини, односно до 300 Mbp/s и се очекува до крајот на годината да биде достапна за околу 85% од домовите каде Близу има покриеност во Македонија.