Poslovne vesti - Makedonija

Дизелот поскапува два денари, бензините половина денар

Малопродажната цена на бензините се зголемува за половина денар, додека цената на дизелот се зголемува за два денари, објави во понеделникот Регулаторната комисија за енергетика.

Согласно одлуката, новата цена на еуросуперот БС-95 изнесува 58 денари за еден литар, а литар еуросупер БС-98 ќе се продава по 60 денари.

Новата цена на еуродизелот од ноќеска на полноќ изнесува 41 денари за литар, додека екстра лесното масло за домаќинство (ЕЛ-1) ќе се продава по 29,5 денари за литар.

Малопродажната цена на мазутот М-1 НС се зголемува за 2,389 денари, со што цената на М-1 НС изнесува 15,246 денари за еден килограм.

Просечната цена на сурова нафта на светскиот пазар во изминатиот 14-то дневен период изнесуваше 32,076 $/барел и е за 12,88 отсто повисока од просечната цена на сурова нафта (28,415 $/барел) по која беа формирани тековните цени на нафтените деривати.

Курсот на денарот во однос на доларот во изминатиот 14-то дневен период изнесуваше 56,3628 ден/$ и е за 0,403% понизок од курсот на доларот (56,5906 ден/$) по кој беа формирани цените.

Референтните цени на нафтените деривати на светскиот пазар во споредба со изминатиот четиринаесетдневен период бележат зголемување кај бензинот во просек за околу 1,69% или за 6,45 $/тон, кај дизелот зголемување во просек за околу 10,13% или 25,50 $/тон и кај мазутот зголемување во просек за околу 25,71% или за околу 28,84 $/тон.