Poslovne vesti - Makedonija

Нови вработувања во индустриските зони

Нови 1.300 до 1.400 вработувања се очекуваат да се отворат во технолошко-индустриските развојни зони до крајот на годината.

Премиерот Емил Димитриев и директорот на Дирекцијата на ТИРЗ, Виктор Мизо, денеска ја посетија ТИРЗ Бунарџик, каде што Мизо информираше дека во моментот има преговори со седум до осум компании и оти очекува две до три компании да донесат позитивни одлуки за инвестирање до крајот на годината.

Заклучно со минатата година во технолошко-индустриските зони се отворени 5.100 работни места, а само годинава се креирани 1.050 работни места.

„Зоните во Република Македонија имаат силен ефект врз економијата, особено во делот на отворањето нови работни места и во делот на извозот“, изјави Димитриев.

Тој ги посети фабриката „Хајтек“ и втората фабрика на „Ван хол“. Раководството од македонската компанија „Хајтек“ планира до крајот на годината да заврши со градењето на фабриката и во почетокот да вработи 100-ина лица, а потоа според планот да се вработат вкупно 300 лица.

Компанијата „Ван хол“, пак, која го гради вториот свој капацитет во Македонија ќе инвестира 15 милиони евра и планира да се отвори 400 директни работни места.

Со оваа странска инвестиција ќе бидат отворени дополнителни 100 индиректни вработувања преку компанијата „Актива“, која работи со „Ван хол“.