Poslovne vesti - Makedonija

"Макпрогрес" со нова линија за производство на наполитанки и вафли

Компанија „Макпрогрес“ - Виница заврши со монтажа и подготовка за пуштање во употреба нова линија за производство на наполитанки и вафли од брендот „винчини“, инвестиција вредна 1,5 милиони евра.

Инвестиција обезбедува нови 30 вработувања и зголемување на извозните капацитети на компанијата.

„Со своите континуирани инвестиции и висока стапка на раст, ’Макпрогрес‘ го потврдува својот епитет на една од најголемите прехранбени индустрии во Македонија и една од најуспешните извозноориентирани компании, чии производи се продаваат на пазарите во над 50 држави во светот“, велат од оваа компанија.

Од таму додаваат дека „Макпрогрес“ е еден од двигателите на македонската економија, компанија која придонесува кон севкупниот развој на домашната економија, вистински пример за останатите дека дури и во услови на криза може да се остварува амбициозна цел – до 2020 година да го зголеми производниот капацитет двојно од оној во 2014.

„Токму интересот и побарувачката за производите на ’винчини‘ надвор од границите на Македонија, беа мотив за компанијата да го прошири производството и да инвестира во нова технологија“, велат од „Макпрогрес“.

Со новата инвестиција компанијата очекува да ја достигне бројката од близу 600 вработени и со тоа претставува најголем работодавец од прехранбената индустрија во источниот дел на Македонија.