Poslovne vesti - Makedonija

Само сертифицираните се сигурно органски производи

Само сертифицираните продукти се задолжително органски. Купувачите можат да бидат сигурни во македонските сертификациски акредитирани компании кои работат по истите правила како и оние во Европската Унија. Двете сертификациски тела, кои засега потврдуваат органско производство кај нас, подлежат на еднакви ригорозни контроли, а можноста за манипулација е сведена на минимум.

Македонското органско растително производство засега најмногу може да понуди житни култури, фуражни, грозје и ароматични лековити растенија, додека во органското сточарство, предничи овчарството, посочуваат од Министерството за земјоделство. Минатата година се регистрирани вкупно 3.089 хектари под органско производство, а бројот на органски производители бил 481, кои добиле над 47 милиони денари субвенции.

Од минатата година субвенциите се зголемени за 30 отсто, а на производителите им се исплаќаат и дополнителни 50 проценти од трошоците за сертификација.

Според експертите, за развој на органското производство е неопходно постојано истражување, континуирана едукација и пред се, прилагодување кон побарувачката. Фокусот, сметаат, треба да се стави на руралните средини кои имаат голем потенцијал поради екстензивното традиционално земјоделство.

„Добро планирање, организирање, здружување, учење и постојано следење на трендовите, односно на барањата на потрошувачите се клучни за органското земјоделство“, посочува професорката Рукие Агич од Факултетот за земјоделски науки и храна.

Побарувачката за органски производи на светско ниво лани достигна 90 милијарди долари за разлика од 1999 година кога беше 15 милијарди. Најголеми потрошувачи се Швајцарија, Германија, Велика Британија, Луксембург и Данска, а најголем производител е Австрија. Побарувачката е голема и во САД и Канада.

Од Агенцијата за храна и ветеринарство укажуваат, при купувањето македонски органски производи домашните потрошувачи да ја бараат националната ознака - сонце околу кое вирее фиданка зашто само тие производи што на себе ја имаат ознаката се сертифицирани и гарантирано квалитетни, согласно стандардите за органско производство