Poslovne vesti - Makedonija

Нови странски инвестиции

Инвестицискиот апетит за Македонија не стивнува. До крајот на годинава во земјава се очекува да стасаат по една холандска, грчка и арапска инвестиција.

Холандската компанија „РиС Тишју калчр лабораторис“, преку браунфилд- инвестиција во Македонија планира да вложи 3 милиони евра, со што во наредните три години ќе отвори најмалку 100 работни места, од кои 35 проценти со високо образование и потребни вештини. Оваа компанија се занимава со одгледување растенија и хортикултурни семиња во лабораториски услови или чиста еколошка средина.

Според планираното, Холанѓаните наесен треба да стартуваат со работа во виничко-кочанскиот регион, а од Македонија производството ќе го извезуваат во Западна Европа.

Во Македонија е присутна и холандската „Антура“, која веќе ја објави својата инвестиција и стартуваше со изградба на фабрика, односно лабораторија за семе за цвеќиња. „Тишју калчр лабораторис“ заедно со „Антура“ ќе прават заеднички холандски кластер кај нас, а оваа идеја треба да резултира со можност да се приклучат и други вакви компании.

Грчката инвестиција е тешка 6 милиони евра и е на компанија „Харма фрут“. До крајот на годинава се најавува изградба на центар за откуп и пакување земјоделски производи и ладилник во Гевгелија, во што ќе се вложат три милиони евра. „Харма фрут“ е една од најголемите грчки компании за откуп на земјоделски производи со 20-годишно искуство. Своите производи ги пласира на пазарите во Европа, Блискиот Исток и Русија.

Заинтересиран за инвестирање во земјава е и сопственикот на „Дамац“, една од најголемите градежни компании во Дубаи, Хусеин Сајвани. Македонскиот министер за привлекување странски инвестиции Џери Наумоф на маргините на инвестицискиот самит, кој се одржа од 8 до 10 април во Дубаи, се сретнал со Сајвани при што е договорено претставници на компанијата во септември да ја посетат Македонија.

Последната зделка на „Дамац“ е и соработката со американскиот тајкун за недвижности Доналд Трамп за изградба на луксузен комплекс вили во Дубаи.