Poslovne vesti - Makedonija

Четири фирми со признание за најуспешни претприемачи

Четири компании добија награди за најуспешни претприемачи за 2016 година, на прексиноќешното јубилејно 10. издание на манифестацијата "Претприемач на годината".

Во категоријата мали претпријатија првата награда му припадна на Деан Бадаревски од "Софа студио" - Скопје, а втората награда на Васко Брдаровски од "Евросуровина ПА" - Битола. Првонаграден во категоријата на микро претпријатија е Хашим Хасани од "Хотел Скардус" - Тетово, а втората награда ја доби Биљана Кукловски од "Чоко авијаторс" - Скопје.

Претселекцијата за избор на "Претприемач на годината - 2016" е направена врз основа на податоците од Централниот регистар. Педесет и шест микро и мали претпријатија, во периодот од 2013 до 2015 година, имаат реализирано раст по основ на број на вработени, вкупни приходи, добивка и инвестиции.

"Во услови на двегодишна политичка неизвеснот, надворешни влијанија на мигрантската криза, како и потешкотиите во економиите на соседните земји, многу е важно да ги поздравиме компаниите кои три години по ред континуирано бележат раст со што успеаја да влезат во категоријата на најдобри мали и микро претпријатија", изјави на доделувањето на наградите претседателката на Сојуз на стопански комори на Македонија (ССК), Даниела Арсовска.

Главни организатори на "Претприемач на годината 2016" се Сојузот на стопански комори на Македонија, Македонската развојна фондација за претпријатија и Стопанската комора на северозападна Македонија. Коорганизатор е Националниот центар за развој на иновации и претприемачко учење. Институционален покровител е Министерството за економија.

На манифестацијата "Претприемач на годината" во изминатите десет години се наградени 40 претприемачи, а Министерството за економија додели вкупно шест специјални награди.