Poslovne vesti - Makedonija

Десет компании за изградба на хидроцентралите Чебрен и Галиште

Од вкупно 16 пријавени компании, десет ја поминаа првата фаза за изградба на хидроцентралите Чебрен и Галиште.

„Со ова успешно завршува првата фаза и се докажува дека има заинтересираност за изградба на хидроцентралите на Црна река и очекувам кон крајот на јули да заврши втората фаза за доставање на понуди“, рече вицепремиерот за економски прашања Владимир Пешевски.

Шест компании и четири конзорциуми, кои ја поминаа првата фаза, треба до 29. јули да ги достават понудите.

„По изградбата на првата хидроцентрала Чебрен, со спојување на Тиквеш, ќе придонесеме овој потенцијал максимално да биде искористен“, рече првиот човек на ЕЛЕМ, Влатко Чинговски.

Новиот шести тендер што беше објавен кон крајот на јануари имаше измени со цел да биде поатрактивен за инвеститорите, беше намален финансискиот критериум на компаниите и отворена беше можноста проектот Чебрен и Галиште да се оддели доколку инвеститорот одлучи дека сака да ја гради хидроцентралата на Чебрен.

Проектот останува по концептот на јавно-приватно партнерство со Електрани на Македонија.

За изградба на хидроцентралите веќе неколку години се бара инвеститор, а неговата вредност е проценета на над 700 милиони евра.