Poslovne vesti - Makedonija

„Diamond Garden“ го воведува трендот на зелено домување

„Адора Diamond Garden“ е нов атрактивен станбено-деловен објект, со кој „Адора инженеринг“ го воведува брзорастечкиот светски тренд на зеленото домување во Македонија.

Овој објект е уникатен по своите два атриуми - отворени средишни простори со стаклен покрив. Тие ќе бидат извор на природна светлина и свеж воздух во целиот комплекс.

Во внатрешноста, покрај целата висина, објектот е збогатен со зелени градини, кои на комплексот му даваат специфичен изглед, а на станарите чувство дека домуваат во вистинска зелена градина.

„’Адора Diamond Garden‘ е со екстериер инспириран од зелениот дијамант, прекриен со многу стаклени површини и дијамантски структурни црти. Во становите аголните делови во дневниот престој се целосно во стакло со изобилство на природна дневна светлина и прекрасни визури кон надворешниот амбиент. Пристапните ходници кон становите се галериски поставени и овозможуваат поглед кон внатрешните зелени градини во комплексот“, вели Душко Чифлиганец, заменик генерален директор на „Адора инженеринг“.

Дијамантската градина ќе биде на десет ката, со два влеза, четири супер брзи лифтови и распоред на седум станови на еден кат со површини од 30, 50, 70, 85, 90, 110 и 200 квадратни метри.

Централниот дел е осмислен како заеднички облагороден простор за заедничко дружење на станарите. На приземниот дел во објектот има ексклузивни деловни простории од 50 до 1.100 квадратни метри, со можност за спојување, голема катна висина, впечатливи излози и директен пристап од главната улица. Објектот располага со сопствени подземни и паркиралишта на партер.

„Адора Diamond Garden“ ќе се гради на атрактивна локација во населбата Тафталиџе во општината Карпош во Скопје, со поглед на падините на Водно.