Poslovne vesti - Makedonija

Две нови инвестиции до крајот на годината

До крајот на декември во земјава треба да дојдат уште две нови странски инвестиции. Како што најави вчера премиерот Никола Груевски, со овие инвестиции се очекува да се отворат најмалку 500 работни места.

„’Кап-кон’ ќе ја отвори наскоро својата фабрика. Тоа е американска глобална компанија од автомобилската индустрија. Втората фабрика е на италијанската ’Технокозе’, која ќе биде четири пати поголема од првата. Овие две фабрики ќе вработат најмалку 500 лица“, изјави премиерот Груевски. Тој нагласи дека во текот на овој месец е можно да се официјализира и влез на уште една глобална американска компанија која дополнително би вработила уште 500 лица.

Тој се осврна и на трите инвестиции што беа официјализирани последнава недела и тоа на „Монтанте груп“ и на „Гентерм“ која веќе го постави камен-темелникот и ја изведува градбата на новата фабрика во Прилеп. Планирано е во неа да се вработат околу 2.000 луѓе и да се произведуваат грејачи за автомобили. Третата инвестиција е фабриката за ориз во Кочани на турската „Левидиагро“.