Poslovne vesti - Makedonija

ЕВН ја реконструира мрежата во Ресен

„ЕВН Македонија“ ја заврши втората фаза од проектот за реконструкција на дистрибутивната мрежа во Ресен. Вкупната инвестиција изнесува 100.000 евра, а средства се издвоени и за редовно одржување во кондиција на нисконапонската мрежа, трафостаниците и среднонапонската мрежа во целата општина.

Во село Грнчари е изградена нова компактна бетонска трафостаница со моќност од 800 киловолт-ампери и кабелска врска од 0,5 километри. Комплетно е реконструирана постојната и изградена е нова нисконапонска мрежа во должина од еден километар, со што во целост е решено снабдувањето со електрична енергија за корисниците во овој дел од општината Ресен.

Со веќе завршената реконструкција на далноводот во Лескоец и на далноводот во Крушија, кој ќе почне на крајот од август, целосно ќе се зголемат сигурноста и квалитетот на снабдувањето, а ќе се намали и бројот на евентуални прекини во снабдувањето со електрична енергија. Со ова се подобрува снабдувањето и се отвораат можности за економски развој на населените места крај Преспанското Езеро во делот од Отешево до Стење и делот кон Јанкоец, Избишта, Златари, Сопотско, Лева Река и Кривени.