Poslovne vesti - Makedonija

Холандски компании ќе инвестираат во земјоделството

„Холандски компании се заинтересирани за инвестирање во македонскиот земјоделски сектор“, истакна вршителот на должноста амбасадор на Холандија во Македонија, Питер Верхеен, на денешната средба со македонскиот министер за земјоделство, шумарство и водостопанство, Михаил Цветков.

„Кралството Холандија претставува втор најголем извозник на земјоделски производи во светот и тие во македонското земјоделство гледаат големи можности за инвестирање“, соопшти по средбата Министерството за земјоделство, шумарство и водостопанство.

Верхеен изразил уверување дека во иднина Кралството Холандија со експертски тимови ќе му помага на македонското земјоделство, со цел полесно и побрзо приспособување кон новите современи текови во производството на храна.

На средбата е констатирано дека соработката на Македонија и на Кралството Холандија е на високо ниво, но на полето на земјоделското производство може да се продлабочува и интензивира.

„Во изминативе неколку години, земјоделството во Македонија доживува вистинска експанзија. Евидентираме зголемување на квантитетот и квалитетот на целокупното земјоделско производство. Позитивни се резултатите во лозаро-винарскиот сектор, во производството на овошје и зеленчук, како и во областа на тутунопроизводството и другите индустриски култури“, нагласил на средбата министерот Цветков.

Министерот го информирал амбасадорот дека заинтересираните фирми за вложување во откупно-дистрибутивни центри имаат можност да добијат и државно земјоделско земјиште, а со цел обезбедување поволни услови за стопанисување, подготвени се и голем број даночни олеснувања, како и можност за брзо регистрирање компанија.