Poslovne vesti - Makedonija

Инфлацијата во јуни 0,5 проценти

Трошоците на живот во јуни, во споредба со истиот јуни минатата година, се зголемени за 0,5 проценти, додека, пак, се на исто ниво како во претходниот месец мај, објави Државниот завод за статистика.

Најголем пораст на трошоците на живот е забележан кај свежото овошје за 18,5 проценти, сувото овошје за 4 проценти, маслото и маснотиите за 3,1 проценти, другите прехранбени производи за 1,3 проценти, јајцата за 1 процент, како и кај рибата, конзервираната риба и алкохолните пијалаци за 0,2 проценти. Пораст на трошоците на живот има и кај болничките услуги за 6,2 проценти, услугите за сместување за 4,3, информатичката опрема за 1,9, течните горива за домаќинствата за 0,4 и големите електрични апарати за 0,3 проценти.

Од друга страна, намалување на трошоците на живот има кај свежиот зеленчук за 8,6 отсто. Намалување е забележано и кај авионскиот превоз на патници за 7,4 отсто, гасот за домаќинствата за 4,2, цврстите горива за 1,2, обувките за 0,6 отсто.

Според статистичките податоци, цените на мало во јуни, во однос на истиот месец минатата година, се намалени за 0,6 проценти.