Poslovne vesti - Makedonija

Инвестиција од 46 млн евра во две гасоводни мрежи

Најдоцна до јуни годинава ќе започне изградбата на две гасоводни мрежи во должина од 110 километри од Штип до Неготино и од Скопје до Тетово, во кои ќе бидат инвестирани вкупно 46 милиони евра, најави во саботата челникот на владејачката партија ВМРО-ДПМНЕ, Никола Груевски.

Како што појасни Груевски при посетата на Кратово, тендерот за гасоводната мрежа од Штип до Неготино е веќе завршен и во тек е процесот на евалуација на понудите, а тендерот од Скопје до Тетово е во тек и треба да заврши на 10-ти март.

На тендерот за изградба на гасоводната мрежа од Штип до Неготино понуди доставиле седум компании, од кои четири компании имаат потполна документација, додаде лидеот на ВМРО-ДПМНЕ.

„Мислам дека работите добро ќе се одвиваат затоа што се поставени на вистински основи. Ова е таканаречена втора фаза. Следува натамошната фаза, со којашто ќе се продолжи од Тетово до Гостивар и Кичево и од Неготино до Прилеп, Битола, Охрид. Се планира кон сите поголеми градови да се продолжи изградбата на гасоводната мрежа“, рече Груевски.

Додаде и дека при крај е и изградбата на гасоводната мрежа од Клечовце до Штип која се очекува да заврши најдоцна до јуни.