Poslovne vesti - Makedonija

КХВ: Нов отворен инвестициски фонд КБ Публикум - МБИ 10

Комисијата за хартии од вредност на Друштвото за управување со инвестициски фондови „КБ Публикум“ АД Скопје му даде одобрение да основа нов отворен инвестициски фонд КБ Публикум - МБИ 10. Според инвестициската стратегија, овој инвестициски фонд првенствено е наменет за инвеститори кои сакаат своите средства да ги вложат на среден рок, односно на период подолг од една година.

„Како инвеститори на Фондот може да се јават домашни и странски институционални и индивидуални инвеститори на кои им е дозволено да вложуваат, во согласност со законската регулатива. Најголемо учество во имотот на фондот ќе имаат сопственичките хартии од вредност на домашните издавачи, односно ќе доминира изложеноста кон македонскиот пазар на капитал. Покрај ваквите вложувања, а заради ликвидност, дел од средствата на фондот ќе бидат вложени во краткорочни депозити во комерцијални банки во Македонија“, информира КХВ.

Од таму појаснуваат, друштвото ќе ги инвестира средствата на Фондот во финансиските инструменти, акции на издавачи кои се составен дел на македонскиот берзански индекс МБИ 10, државни должнички хартии од вредност, депозити кај овластени банки со рок на достасување пократок од една година и отворени инвестициски фондови со најниско ниво на ризик кои вложуваат исклучиво во депозити и должнички хартии од вредност под услов да не наплаќаат трошоци за управување повисоки од еден процент од нето-вредноста на имотот на фондот.