Poslovne vesti - Makedonija

Македонија ќе повлече 220 милиони евра

Република Македонија ќе повлече 220 милиони евра од отворената кредитна линија од Меѓународниот монетарен фонд (ММФ).

Како што информира вицепремиерот и министер за финансии, Зоран Ставрески, Владата го известила Фондот за ваквата одлука да повлече средства од одобрената кредитна линија во износ од 390 милиони евра на почетокот на годината.

- Одлуката е донесена врз основа на променетите околности пред се во делот на политичката ситуација и извесните предвремени избори, како и потребата од одлагање на издавањето на еврообврзницата во такви околности. Ова и од аспект на одговорното однесување на Владата да ги антиципира тие настани и да презема мерки за обезбедување доволно средства за редовно извршување на буџетот во следните неколку месеци додека трае процесот на изборите - изјави министерот за финансии, кој појасни дека не се повлекува целиот износ од одобрената кредитна линија од 390 милиони евра, што е потврда дека таа се користи за да се преброди овој период кога има неочекуван настан.

Според Ставрески ова е период кога има ризици во однос на можноста да се излезе на пазарот на еврообврзница и не може да се чека да се распушти Парламентот и Владата да функционира како техничка.

- Мора да се преземат мерки однапред за да се обезбедат доволно средства за редовно извршување на сите функции на буџетот, за ликвидноста на економијата и слично. Средствата ќе се трошат за сите буџетски потреби, а ќе се настојува да се вратат предвреме доколку се укажат можности за тоа - нагласи Ставрески.

Средствата се одобрени под исклучително поволни услови со камата од 1,4 отсто, со рок на отплата од пет години со грејс период од три години и еден квартал.

- И натаму ќе останеме партнер на ММФ и обратно, ММФ партнер на Македонија како земја со здрави и солидни економски политики. Ќе настојуваме во иднина да бидеме посветени да излеземе на пазарот на еврообврзница тогаш кога околностите ќе бидат соодветни и доклку се укажат такви околности можно е и ќе настојуваме пред време да ги вратиме средствата кон ММФ - истакна Ставрески.