Poslovne vesti - Makedonija

„Македонија пат“ и „Македонски шуми“ меѓу најголемите должници за ДДВ

Две јавни претпријатија, „Македонија пат“ и „Македонски шуми“, се во врвот на листата на должници, објави Управата за јавни приходи.

Се работи за долгови кои се достасани до 31 март, а неплатени до 30 јуни годинава по основ на ДДВ, данок на добивка, персонален данок на доход, придонеси од задолжително социјално осигурување, акцизи и царини, за кои вкупниот износ на долгот е повисок од 120.000 денари за физичките лица и самостојни вршители на дејност и повисок од 300.000 денари за правните лица. На листата има 4.594 должници, физички и правни лица.

Македонија пат должи речиси 430 милиони денари за ДДВ и данок на добивка, додека „Македонски шуми“ должи 256 милиони денари за ДДВ.

Во врвот на листата должници неколку години по ред се наоѓаат и фирмите „Ел Дон Кастило Ангел“, која должи речиси 630 милиони денари за ДДВ и данок на добивка и „Индустија Ел Азтека“ и „Мотор Коач индустрија“, кои должат 629 милиони денари.