Poslovne vesti - Makedonija

Нема интерес за државното земјиште во Велес

Нема интерес за купување државно градежно неизградено земјиште во Велес.

Седумте парцели во комплексот „Узус“ наменети за мало стопанство не беа атрактивни за да се јави потенцијален инвеститор. Со почетна цена од 700 денари за квадратен метар, на јавното наддавање во Министерството за транспорт и врски не се јавија најмалку две заинтересирани лица за истото да се одржи. Оттаму најавуваат дека наскоро ќе се распише нова јавна објава со која ќе се продаваат овие седум плаца, чија површина е од 680 до 860 квадратни метри.

Во економската зона „Узус“, која е целосно инфраструктурно уредена, со пат, вода и струја, во последните неколку години државата продаде педесетина плаца наменети за малото стопанство. Веќе работат триесет мали и средни фирми со 300 работници, но обидите да се продадат последните слободни плацови се неуспешни. Министерството за транспорт и врски не ги продаде ниту трите плаца во велешката населба Тунел 2, наменети за изградба на индивидуални станбени објекти, чија почетна цена беше 800 денари за квадрат, иако во градот има недостаток од простор за градење приватни индивидуални куќи.

За илустрација, во 2009 година има издадено 56 одобренија за градење наспроти 63 во 2008, а лани се издадени 22 одобренија за адаптација, наспроти 17 во 2008. Повеќето од одобренијата за градење се за куќи што се срушени, а на нивно место се градат нови. Потенцијалните купувачи велат дека цената за понудениот простор и во двата случаја, за мало стопанство и за станбени објекти, е превисока поради што јавните наддавања и во вториот обид се неуспешни.