Poslovne vesti - Makedonija

Од јули директен лет Скопје­-Доха со Катар ервејс

Авиокомпанијата Катар ервејс официјално потврди дека од 17 јули годинава ќе почне да лета на линијата Скопје­-Доха-­Скопје.

„Како што не информираа од Катар ервејс, авиокомпанијата ќе почне со процедурите за добивање на потребните дозволи за летање и веќе од 17 јули се воспостави првиот лет од Скопје кон Доха. Се работи за една глобална авиокомпанија која ќе понуди нови можности за македонските граѓани и директни летови кон Блискиот Исток“, најави министерот за транспорт и врски Владо Мисајловски.

Со тоа се зголемува бројот на дестинации со кои Македонија е директно поврзана. Имаме триесетина дестинации од кои 25 се достапни преку нискобуџетните летови.

Во 2005 година од македонските аеродроми се летало на вкупно 17 дестинации, а во 2016 на 35 дестинации.

Од 35 дестинации Визер покрива 25, а други авиопревозници ги покриваат дестинациите Загреб, Дубаи, Белград, Љубљана, Истанбул, Виена и Цирих. Авионите на Визер сообраќаат до Лондон, Венеција, Малме, Базел, Ајндховен, Дортмунд, Милано, Минхен, Меминген, Стокхолм, Гетеборг, Брисел, Франкфурт, Келн, Париз, Барселона, Осло, Нирнберг, Хамбург, Фридрихшафен, Базел преку Охрид, Берлин, Копенхаген, Братислава и Хановер.