Poslovne vesti - Makedonija

„Повардарие“ пред стечај, лозарите најавија протест

Лозарите од Тиквешко најавија дека утре ќе протестираат пред судот во Велес за време на судското рочиште на кое ќе се бара винарската визба „Повардарие“ од Неготино да оди во стечај. Лозарите се против стечај затоа што ќе останат без парите за предаденото грозје од годинешната берба, вели Љупчо Аризанов, претседателот на Здружението на лозарите.

„Повардарие“ годинава откупи грозје од околу седум илјади лозари кои стравуваат дека ќе ги изгубат парите што им ги должи винарската визба ако таа оди во стечај. Тие велат дека нема да дозволат винарницата да оди во стечај и дека ќе ги блокираат сите институции.

Стечајната постапка е поведена од еден од доверителите на винарницата. „Повардарие“ го оспорува овој долг.

Годинава „Повардарие“ место предвидените 15, откупи 31 милион килограми грозје. Се проценува дека вкупниот долг на „Повардарие“, заедно со неплатениот откуп од лани е околу шест милиони евра. На лозарите им се исплатени само 20 отсто од долгот и заостанатите пари ги очекуваат до Нова година.

Неодамна винарската визба информираше дека тие се единствената винарница во државата која широко ги отвори вратите за откуп по повикот од Владата.