Poslovne vesti - Makedonija

Проработеа мини хидроцентралите во Крива Паланка

Од денеска започнаа со производство на електрична енергија неколку мини-хидроцентрали во Крива Паланка. Капацитетите се изградени преку јавно-приватно партнерство на локалната самоуправа на општина Крива Паланка и инвеститорот „Хидро Осогово“, Скопје.

„Годишното количество на електрична енергија, кое ќе се произведува во електраните, е 3,5 мегават часови. Покрај четирите хидроелектрани, заради оптимално производство на електрична енергија, инвестиравме и во нов цевковод, со стаклено-пластични цевки со должина од над 5 километри и рок на траење од 200 години, информира Жарко Кржовски од „Хидро Осогово“.

Вкупната инсталирана моќност ќе изнесува 681 киловат. Зголемениот капацитет ќе придонесе и за поголеми приходи за општината на која, според договорот, припаѓаат 17 проценти од целокупното производство на електрична енергија.