Poslovne vesti - Makedonija

Се продаваат парцели за куќи и за мотели на езеро „Младост“

Општина Велес објави оглас за продажба на градежни парцели на неизградено земјиште околу езерото „Младост“.

Парцелите се наменети за изградба на куќи во викенд-населбата на патот кон езерото и село Новачани, како и за хотелски комплекси покрај езерото „Младост“.

На електронско јавно наддавање се понудени 25 парцели за индивидуални куќи на приземје и еден кат. Почетната цена на наддавањето изнесува 283 денари за квадратен метар, а парцелите се со површина од 586 до 1.590 квадрати. Лицитацијата на овие парцели ќе се одржи на 7 и на 8 јули. Во претходните продажби веќе се отуѓени 17 плаца.

На продажба се понудени и два плаца со намена за изградба на хотелски комплекси. И тие се продаваат со почетна цена од 283 денари за квадрат, а се со површина од 3.800 и 10.600 квадрати. На првата парцела може да се изгради објект на П+2, а на втората П+3 ката. Наддавањето за овие парцели е закажано за 21 јули.

И на двата огласи можат да се јават физички и правни лица, граѓани на Македонија, но и странци. Лани по пат на електронско јавно наддавање Општина Велес отуѓила вкупно 26 градежни парцели од кои 10 се со намена Г2-лесна и незагадувачка индустрија, 4 парцели се со намена А4-мотели, 2 со намена А2-домување во станбена зграда, една парцела е за хотелски комплекс и 9 се за изградба на викенд-куќи. Од продажба по пат на јавно наддавање, во 2015 година во општинскиот буџет се слеале 37,5 милиони денари.