Poslovne vesti - Makedonija

Седум милиони евра за санација на штетите од ланските поплави

Со седум милиони евра помош од втората компонента од Програмата на Европската Унија ќе се санираат штетите и ќе се намалуваат ризиците од поплави во подрачјата што беа најпогодени во минатогодишното невреме.

Целта на новиот проект, кој е имплементиран од Програмата за развој на Обединетите нации (УНДП), е да се реконструира оштетената водостопанска инфраструктура на шест локации во источниот, западниот, југоисточниот и пелагонискиот регион во земјата.

Ќе се обнови регулацијата на речните корита и одводните системи на речните басени на Црна Река и реката Струмица. Исто така, ќе се рехабилитира и ќе се подобри управувањето со четири брани од приоритетно значење, „Мавровица“, „Слатина“, „Дренска Река“ и „Липа“.

Дополнително, проектот ќе обезбеди целосна поддршка на институциите за да се подобри управувањето со новата инфраструктура и да се зголеми нејзината отпорност на поплави во иднина.

Програмата, чија вкупна вредност изнесува 10 милиони евра, ќе се одвива во наредните две и пол години.

Втората компонента е седум милиони евра за спроведување на приоритетни мерки за намалување на ризиците од поплави во најпогодените подрачја, додека, пак, првата компонента од три милиони евра се однесува на реконструкција на оштетените патишта и мостови, и нејзината имплементација е во тек.