Poslovne vesti - Makedonija

Средства од ЕИБ за компании со иновативни проекти

Македонските компании може да аплицираат со иновативни проекти за добивање финансиски средства од Европската инвестициска банка.

Средствата се во висина од над 24 милијарди евра и тие можат да се искористат до 2020 година, а се наменети најмногу за малите и средните компании од Западен Балкан кои имаат иновативни и развојни проекти.

Како што информираше извршниот директор на Сојузот на стопански комори, Митко Алексов, на вчерашната прес-конференција, финансиски средства се издвоени и за пилот-проекти во областа на обновливите извори на енергија, проекти за вакцини, лекови, медицински и дијагностички уреди.

„Регионално, активностите на ЕИБ се прошируваат со фокус на компании со иновативни проекти. Поточно, утврдени се и категоризирани неколку сегменти за финансирање: банки и финансиски посредници, средни и големи иновативни бизниси, како и големи истражувачки и иновациски проекти кои произлегуваат од универзитетите и истражувачките организации“, рече Алексов.

Финансирањето ќе се одвива преку банките, поради што тие во следниот период би требало да се концентрираат на иновативните компании и проекти.

Европската инвестициска банка досега преку четири транши има одвоено средства во вкупна вредност од 350 милиони евра за македонските компании, а искористеноста е задоволителна.