Poslovne vesti - Makedonija

Туристичката понуда на Македонија претставена на саем во Данска

Туристичката понуда на Македонија деновиве првпат беше претставена на Саемот за туризам во Копенхаген, Данска.

Како што информира Агенцијата за промоција и поддршка на туризмот, на тридневниот саем, кој е организиран од елитното списание за туризам „Вагабонд“, Македонија разбуди огромен интерес кај данската публика како неоткриена дестинација од помладите и вредна за посета за повозрасните, кои пред многу години ја посетиле и сакаат повторно да сведочат за нејзиниот развој.

Агенцијата за туризам при промоцијата на туристичката понуда на Македонија во Данска се фокусираше на природните убавини на земјава вклучувајќи ги и спортските активности и гастрономијата, кои беа дополнително промовирани пред публиката од Данска.

„Интересот за Македонија од страна на данските тур-оператори е неверојатно голем, па некои од нив уште идната година ќе ја вклучат нашата земја во нивната понуда“, изјави економскиот промотор на Македонија во Данска, Мирјана Наумоска.

Данците користат пет до седум недели за одмор во текот на годината, а патуваат о три до четири пати годишно, каде што во просек трошат по 1.300 евра, со што се вбројуваат во една од нациите кои се најголеми потрошувачи кога е во прашање патувањето.