Poslovne vesti - Makedonija

Владата се задолж 40,1 милиони евра

Иако најави дека ќе се задолжи за 16,1 милиони евра, Владата денеска позајми за два и пол пати повеќе, односно 40,1 милиони евра од домашните кредитори. 

Ова е трето задолжување на Владата на домашниот пазар на капитал за оваа година, но е прво нејзино позајмување во кое таа го надмина најавениот износ. На претходните две аукции се позајмуваше онолку колку што беше предвидено во проспектите на Министерството за финансии, како и онолку колку што требаше да врати по основ на веќе достасани долгови во наредниот ден. 

Утре државата треба да врати 16,1 милиони евра, па нејасно е зошто се задолжи на поголема сума. Домашните кредитори бараа да запишат уште повеќе државни хартии од вредност, односно речиси двојно повеќе и од оние 40 милиони евра што и' ги позајмија на државата. 

Најголемата сума Владата ја обезбеди преку едногодишни државни записи, и тоа 16,7 милиони евра, со камата од 2,1 отсто. Сума од 9,4 милиони евра, пак, е земена со рок на враќање од 15 години, со камата од 3,8 отсто. Позајмени се и средства преку двегодишни обврзници во износ од 14 милиони евра, со каматни стапки од 2,2 и 2,3 проценти. 

Според последните објавени показатели, пак, заклучно со третиот квартал од минатата година, јавниот долг на земјава достигна 4,7 милијарди евра, што е 50,6 отсто од бруто-домашниот производ на земјава.