Poslovne vesti - Makedonija

Започна откупот на тутунот два дена пред законскиот рок

Два дена порано од договореното започна откупот на тутун во државава. Наместо утре, како што е законски утврдено, министерот за земјоделство, Љупчо Димовски, во придружба на својот домаќин, Игит Тунџел, генерален директор на Сокотаб" - Битола, вчера го означи официјалниот почеток на откупот на тутунот од годинешната реколта.

- Откупот го почнуваме два дена порано од законската обврска. Очекуваме тутун со повисок квалитет од лани и откуп на околу 25 милиони килограми, што е за пет милиони помалку од минатата година - изјави Димовски.

Според претседателот на Сојузот на здруженијата на тутунопроизводители, Данчо Милевски, квалитетот на реколтата, иако речиси четири недели подготвена за предавање, поради складирањето нема да се намали.

- Квалитетот на тутунот годинава е одличен, најдобар од досегашните најмалку пет до шест реколти, и нема да се намали со чувањето доколку е тоа соодветно. Напротив, ќе стане уште подобар. Со снижување на температурите почнува ферментацијата, а така се подобрува и бојата - рече Милевски.

Откупот на тутунот на сите пунктови во државата го вршат комисии во кои задолжително има претставници од здруженијата на тутунопроизводители.

- По завршувањето на откупот веднаш ќе следи исплатата на субвенциите кои се идентични како минатата година - 60 денари за килограм предаден тутун. Со тоа продолжува нашата поддршка кон оваа стратешка земјоделска култура - истакна Димовски и потврди дека на последната конференција на Светската здравствена организација била донесена одлука со која се ублажуваат критериумите за употребата на адитивите во брендираните цигари и која им е во прилог на тутунопроизводителите во Македонија.

Производителите, пак, остануваат на барањето оценката на тутунот да оди во две класи, прва и втора, а цената да биде повисока од лани. Ако тоа не се реализира, задоволни ќе бидат и со 190 денари за килограм, колку што беше минатогодишната просечна цена.

- Бараме цените во просек да изнесуваат 190 денари или 250, 200 и 170 денари за прва, втора и трета класа, независно што според потпишаните договори се дефинирани на 208, 162 и 123 денари. Производните трошоци годинава се зголемија за 20 до 30 отсто. Наемната рака лани беше 70 денари, а годинава 100 до 120 денари на час, додека машинското расадување од 700 денари за декар порасна на 1.200 денари - нагласи Милевски.

Откупот, според најновите измени на Законот за тутун, треба да почне најдоцна до 15 декември, а завршува заклучно со 15 март. Министерството за земјоделство наскоро ќе ја ефектуира соработката со кинески експерти и ќе потпише протокол за извоз на македонски ориентален тутун во Кина.