Poslovne vesti - Makedonija

Жената е најупорен и најуспешен лидер

Во Македонија вчера започна Глобалниот самит на жени лидери на кој учествуваат над 300 жени од пет континенти и околу 40 панелисти кои ќе ги споделат своите искуства за тоа како да се биде жена лидер.

„На патот кон подобрување на севкупното живеење, жената е најчестиот, најупорниот и најуспешниот лидер. Таа е присутна во бизнисот, во уметноста, во културата, социјалата, здравството, дипломатијата, новинарството, администрацијата... Она што го прави посебно нејзиното присуство и ја издвојува е нејзиниот пристап, емотивност, префинетост, интуиција, одлучност и иницијативност“, нагласи сопругата на претседателот на Ѓорге Иванов, Маја Иванова, која е покровител на настанот.

Според претседателката на Сојузот на стопански комори, Даниела Арсовска, жените на пазарот на трудот се активни насекаде и во последните 20-ина години се надминува јазот во родовата еднаквост.

„Во споредба со регионот, Македонија добро котира во однос на родовата еднаквост. Но, се' уште жените не успеваат да стигнат до клучните позиции во општеството“, истакна Арсовска.

Министерката за информатичко општество и администрација Марта Арсовска- Томовска оцени дека застапеноста на жената во политиката не е на задоволително ниво и дека треба да се поработи на тоа поле.

И за претседателката на Здружението на бизнис-жени на Македонија, Валентина Дисоска, мал е бројот на жени на менаџерски позиции и на тоа треба во иднина да се посвети внимание.

„Жените најчесто работат во секторот услуги или она што го знаат. Но, малку инвестираат средства за да развијат сопствен бизнис“, рече Дисоска, според која потребна е едукација за да се градат лидерските вештини на жените.